الخميس - الموافق 28 مارس 2024م

هش الدخان شعر /عادل عبد الرازق

ما سألتش نفسك يوم
ما حاولتش مرًة تسأل غيرك


ليه دايماً تايهة ملامحك في ملامح الناس
ليه كاره الإحساس
إنك ترجع تاني الإنسان
فسر لي الغربة اللي ف وشك وارسمها
حتلاقي الدخان بيحاوطك
وللمرة الألف تعود مهزوم

تتمدً إيديك تاخد أشياء وحاجات
والناس الماشية في الشارع ألوان
مين قال إن الخطوة لا مبالاة
مين قال إن الأه أحزان

زحمة الشارع في وجودك
ودماك في عروقك سرطان
ما حاولتش مرًة تهش الدخان

إشرخ راسك طلًع عقلك
عيد ترتيبه من الأول
ما يهمكش نزيفه وفتاته
ما يهمكش انه يضيع أو يتحوًل

إبحث ، دوًر ، رتب ،
لخبط
حاول م الأول
يمكن
أو جايز ترجعلك لهجتك الأولى
وتخطي السور المترشق في الشارع
وتعود
زي زمان
ما سألتش نفسك يوم
ليه ما حاولتش مرًة تهش الدخان
***

 

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك