الجمعة - الموافق 29 مارس 2024م

قصيدة : حساب الصدفة .. شعر : عادل عبد الرازق

ما عملتش حساب الصدفة
وقابلتك


ياريتني ما كنت شوفتك
ولا عشقتك
لقيتك زي ما فارقتك
جمال وغرور
لقيتك زي ما سبتك
حيطان ورا سور
يا ريتني كنت رميت صورتك
وشخبطتك
ما عملتش حساب الصدفة
وقابلتك
سيبيني اموت…
وافرد شراعي للمجهول
حيرميني
يبكًيني
ويمحيني
وليلي يطول
ماهو مش معقول
أكون أنا عشقت وانتي بعتي
ريًحيني
وخليني
ماشوفكيش ولو صدفة
مانتي عارفة
إني عاشق
وانتي شاهدة
وانتي شايفة
ما عملتش حساب الصدفة
وقابلتك
ضيًعيني
وارمي بيني وبينك حيطان
سدًي كل البيبان
وانسي كل اللي كان
وان حد سألك قولي ده اتسرق
الحلم اللي كان بينا أو غرق
أو انكسر على كف اللي خان
ياريت ما نتقابل تاني
لا بالصدفة ولا بالأماني
أنا عاهدتك أختفي
وانتي لسه فاكرة عنواني
ما عادش بينا غير طعم السكات
ما عادش ف إيدينا غير ذكريات
طعم الهزيمة غيًر ملامحي
وما عدتش املك غير الفتات
ماحنا اللي كان بينا سراب
ماحنا افترقنا ف طريق كداب
واحنا اللي غيًرنا كل الحاجات

الأنهيار ساكن دمنا
وفي وشنا
وفي حييًنا
وانتي وانا ..
مش لبعضنا
ولا زمانا كان يوم لنا
مش عايز اشوفك صدفة تاني
ولا عايز المح عيونك
إبعدي عن سنيني وعن زماني
أحسن أحبك وارجع أخونك
وتلاقي نفسك بتشتريني
وتلاقيني بعتك
ما عملتش حساب الصدفة
وقابلتك
لكني أكيد في يوم …
حانسى هزيمتك

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك