الخميس - الموافق 28 مارس 2024م

قصيدة : إنتي .. وانا .. والمدينة ــ شعر / عادل عبد الرازق

إنتي ..
وانا ..
والمدينة


ودمعة تعبانه وحزينة
مديت إيديًا في الشوارع
ماتمدتش إيد حلمي اللي ضايغ
والدمع ف عينيكي
رايح وراجع
والريح بترعش لون عينينا
وانتي وانا …
والمدينة
كل الملامح مش وشوش
والصورة مليانة رتوش
والمطره ف إيدينا نقوش
والبرد ف ضلوعنا وإيدينا
إنتي وانا ,,,
والمدينة
أنا وانتي عاندنا ف بعض
ومشينا طريقنا صد ورد
لا اتحملًنا بعض
ولا قبلتنا الأرض
ولا حتى سيبنا دموعنا ..
.. تبكي علينا
إنتي وانا ..
والمدينة
حيارى ضايعين في الضياع
ولا عرفنا مين فينا اللي باع
ولا حتى اللي ابتدا بالوداع
ولا إمتى ولا ازاي انتهينا
إنتي
وانا
والمدينة
الدمع في عينينا وإيدينا
والحزن مالكنا ومالينا
*****************

 

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك