الخميس - الموافق 28 مارس 2024م

،،،ابتسامه،،،قصيده بقلم :- د اسماء المهنا

كل واحد له ابتسامة
فيها بصمة أو علامة
نبتدي بيها الحكاية
وننهي برضه مع السلامة
كل واحد له ابتسامة
فيها بصمة أو علامة

ابتسامة أبويا لما
نبقي راجعين بالسلامة
من خروجة… من سفر
من أي حتة
مااحنا برضه في قلبه حتة
ياما شغلت باله …ياما
وهي دي أحلي ابتسامة

رغم تجعيدات ملامحه
حتي ايده برضه شرحه
كل تجعيدة بتوصف
قد ايه مرت سنين
ع العيون السهرانين
اللي حاملين هم دايما
واللي بينا فرحانين

كل واحد له ابتسامة
فيها بصمة أو علامة
ابتسامة أمي لما
تيجي تصحي الصبح بدري
بتنادينا عشان نقوم
قوموا يالا اصله مش فاضل كتير
وافطروا ياللا وسموا
دعوة منها بالسلامة
دعوة تنفع يوم قيامة
في الحضانة ..في المدارس
حتي في الجامعة ياأمي
كنتي حاملة الهم عني
وابتسامتك هي هي
فيها فرحة أو دراما
كل واحد له ابتسامة
فيها بصمة أو علامة
ابتسامة أخويا لما
يبقي عارف رغم صغره
أنه أكبر مني طبعا
أصله راجل والرجولة
تعني يبقي ضل أخته
هو ده معني الشهامة

كل واحد له ابتسامة
فيها بصمة أو علامة
ابتسامة عمي أو خالي العزيز
هي تعني أنه فاكر ليا
كام موقف لذيذ
مهما أكبر
كل مايزورنا يهزر
ويقابلني بابتسامة

كل واحد له ابتسامة
فيها بصمة أو علامة
وابتسامة جدي لما
فيا يلقي حاجة شبهه
حركة او كلمة بقولها
نظرة أو حتي ابتسامة

كل واحد له ابتسامة
فيها بصمة أو علامة
وابتسامة جدتي الست الجميلة
لما تحكي عن جمال أيام زمان
فيها حاجة طيبة …حلوة….وأصيلة
ابتسامة حب غايبة عن زمانا
فيها معني الود ممزوج بالسلامة

كل واحد له ابتسامة
فيها بصمة أو علامة
ابتسامة صاحبتي الغالية القرييبة
مهما تبعد عمري ماأحسبها غريبة
ابتسامة فيها معني الطبطبة
ذكريات أجمل صبا
سايبة جوانا علامة

وكل واحد له ابتسامة
فيها بصمة أو علامة

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك