الخميس - الموافق 11 أغسطس 2022م

هنادي مهنا للميس الحديدي:لو عندي تصوير بحاول أبقى ست بيت

ياسمين مجدى عبده

حلت الفنانة الشابة هنادي مهنا أمس ضيفة على الإعلامية لميس الحديدي في برنامجها (كلمة أخيرة) المذاع على قناة أون الفضائية حيث تناول اللقاء أخبارها الفنية وحياتها الشخصية.
وقالت الفنانة هنادي مهنا عن بدايات ظهورها (طلعت مع هالة سرحان وأنا عندي 3 سنين وكان أول فيديو كليب ليا كان عندي 4 سنين ونص وكنت فاهمة أنا بقول إيه).
وأضافت خلال لقائها في البرنامج (طول عمري بنت أبويا وأنا أضغر اخواتي وأي مشكلة أنا واخدة صف بابا وحتى لو غلطان ماحدش يزعله لكن لما اتجوزت بدأت أفهم أد ايه الست بتتعب وماكنتش شايفة تعب الست غير لما اتجوزت وبقيت قريبة جدًا من ماما).
وتابعت (احترمت والدتي جدًا وخصوصًا إنها سابت بلدها وجت بلد ماتعرفوش بلغة هي ماتعرفهاش وهي مازالت عايشة في مصر إلى الآن وهي فرنساوية ست جدعة مصرية أصيلة اتعلمت منها حاجات كتيرة ولكن دلوقتي أنا باقولها زوجي بقى كويس جدًا في الفرنساوي وهي دايما بتنصحني بالحاجات العادية لازم يبقى في أكل في البيت على طول ولازم تكوي فانلاته وهي بتقعد لو أنا مش في البيت تعمل كل حاجة ولو ملحقتش أعمل الفطار تروح تعمل الفطار وكل حاجة كأني في البيت بالظبط).
وأكملت (أتمنى إن زوجي ينجح جدًا وبنغير على بعض بس العادي أنا بتعامل في مجتمع مصري فبتخيل الناس تشوف الفنان قدوة وفي ناس كتير بتقلدهم وأنا أتمنى إن الناس تقول لولادها عايزك تبقى زي دي ومش قدامي غير حل من اتنين إن أبقى مع الناس واعمل اللي هما عايزينه علشان يحبوني أو أعمل حاجات تانية في مجتمع تاني).
وأكدت هنادي مهنا من خلال البرنامج عن الغناء أنها تتمنى أن تغني ولكنها لا تتقن الغناء بالعربي مثلما تتقن الغناء باللغات الأخرى مثل الإنجليزية والفرنسية وقالت (بعرف شغل بابا في أي عمل وباشوف أصابعه وهو بيعزف وفي فيلم إن شاء الله ليلة العيد وعاوزة أكون في حتة أنا مبسوطة فيها ).
وعن تأجيل موضوع الحمل والولادة قالت (مأجلين البيبي شوية لأني أنا أصلا بيبي).
وعن حياتها الزوجية صرحت هنادي مهنا (قبل مانزل لازم أعمل الفطار وبعمل غدا بكرة ولو عندي تصوير بحاول أبقى ست بيت).
وقالت (99% من الصور على الإنستجرام فلتر وكلها مش حقيقية والشكل والرشاقة حاجة مش مهمة أبدا المهم البني آدم يكون مبسوط من نفسه من جواه مش مهم أي حد تاني وببقى راضية عن نفسي لما بحس إن شكلي عاجبني).
وتابعت (في ناس بتقولي كان شكلك حلو وانتي تخينة لكن أنا مبسوطة بشكلي جدًا مش فارق كلام أي حد وكنت بتدايق لما أقرأ الكومنتات وأنا تخينة كان في ناس بتقولي وشك شبه البقرة كنت أزعل جدًا واعيط وبقيب ببص في المراية ألاقي نفسي مرتاحة).
وقد أشادت الفنانة هنادي مهنا بمسلسل (مكتوب عليا) التي شاركت في بطولته وتم عرضه في شهر رمضان الماضي خلال البرنامج موضحة أن العمل مع فريق عمل المسلسل جميل للغاية
وتابعت (من قلبي بحبهم جدًا جدًا والعمل مع أستاذ خالد الحلفاوي حلو أوي فهو إنسان محترم وبحب شغله ودمه خفيف).
وقد ظهرت النجمة هنادي مهنا في جلسة تصوير سابقة وسط الأسماك خلال تواجدها في أحد المطاعم المشيدة تحت الماء وقضائها الأجازة الصيفية مع زوجها أحمد خالد صالح ونشرت هنادي الصور عبر حسابها على الإنستجرام صحبها تعليق (مطعم تحت سطح البحر خارج القائمة).
وكان آخر أعمال هنادي مهنا مسلسل (مكتوب عليا) التي شاركت في بطولته مع الفنان أكرم حسني والذي عرض في رمضان 2022 من إخراج خالد الحلفاوي.

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك