الثلاثاء - الموافق 13 أبريل 2021م

حوارمع المعمارى جورج نادر .. اجراه :-اشرف سركيس

مبدع ومتجدد – تلك بعض من الألقاب التى أطلقت على المصمم المعمارى جورج نادر والذى أصبح من النجوم اللامعة فى مجال الهندسة المعمارية بخبرته الطويلة فى المشروعات السياحية والفندقية.
وفى حوار مهنى متخصص إختصنا به المهندس الشاب اللامع بنرحب به وبنسأله
س – يعنى إيه باختصار وببساطة كلمة مصمم معمارى وإيه الفرق بين العمارة والديكورأو إنتريور ديزاين اللى كتير مننا بيسمعها ومبيفهمهاش وإيه اللى ممكن تضيفه كمعمارى فى حياتنا وسلوكياتنا ؟
ج – المعمارى هو المتخصص لخلق أو تصميم بيئة مناسبة أو فراغات مناسبة لأى نشاط بيقوم به الإنسان أو أى كائن على الأرض بحيث تكون مريحة وجميلة وإقتصادية ومستدامة من أول كشك الحراسة حتى مبانى المطارات – والتصميم الداخلى هو فرع من فروع العمارة طبقاً لتصنيف الإتحاد الدولى للمعماريين UIA – والمعمارى رغم إعتقاد الناس ببساطة مهمته لكن هو إللى بيخلى الإنسان يحب مكان أو مش قادر يعيش فيه.
س- ليه من وجهة نظرك معظمنا بيجهل ثقافة المهنة دى ودايماً الأغلبية مننا بيعتمد على نفسه أو خبرات أهالينا وأصدقائنا فى تجهيز شققنا أو محلاتنا ؟
ج – العمارة فيها جزء كبير من الفن والجمال والرقى وهو ما يفتقده المجتمع المصرى من فترة طويلة لأسباب كثير أثرت على إحساس المصرى بأهمية الجمال شوف مثلاً من 50 سنة كانت المبانى شكلها إيه والعمارت دلوقتى شكلها إيه وأصبح المواطن عادي يتقبل أى مبنى مشوه أو يعيش في شقة ليس لها تهوية ولا تدخلها الشمس …. وهكذا أسباب متعددة ممكن نعملها حوار مستقل.
س – رأيك إيه فى إننا بنخاف نطلب مهندس ديكور وده عشان عندنا عقيده إنها بتبقى حكرعلى طبقة وفئة معينه وفى نفس الوقت تكلفة عاليه مش هنقدر عليها ؟
ج – ماهو ده جزء من الفجوة الحادثة بين المعمارى والمجتمع بسبب إنحسار التوعية والتركيز على أهمية دور المعمارى والناس معتقدة أن المهندس بيكلفها فلوس كثير ممكن توفرها لكن للأسف بيحصل العكس لأن عدم الإعتماد على المعمارى بيؤدى لأن الشخص بيقع فى دايرة من الصنايعية والمقاولين وغير المتخصصين ويعمل الشغل ويرجع يكسره لأنه طلع مش عاجبه أو طلع غلط أو مش محقق الوظيفة المرجوة من المشروع بأى من أشكاله ولما تحسب إجمالى الإصلاحات والأضرار على طول عمر المشروع هتلاقى المعمارى كان هايوفرلك مش أقل من 20% من إجمالى التكلفة بالرغم من أنك دفعتله أتعابه.
س- هل تصميم الديكور له مواصفات معينة من حيث المساحة أو الموقع ولا ينفع نعمل تصميم سهل ومريح حتى فى المساحات الصغيرة والضيقة والشقق المتوسطة؟
ج – بالعكس تماماً الشقق الصغيرة والمساحات الضيقة بتحتاج لمعمارى مبدع لإستغلال جميع المساحات لأن المساحات الواسعة ممكن يكون سهل تتعامل معاها لكن مش هاتعملها أبداً كما لو صممها معمارى متمكن وعنده خبرة كافية فى التصميم الداخلى.
س- مين هما الغالبية من عملائك وإيه الجديد فى عالم الموضه والديكور من حيث الخامات والألوان والقماش والموبيليا والمفروشات ؟
ج – إحنا فى المكتب على مدار 20 سنة عندنا عملاء من كل الطبقات من أول دكاترة الجامعة حتى أبسط الناس لأن أى واحد بيشرفنا بالزيارة بيقتنع بأهمية دور المعمارى وإزاى هايفرق معاه جمالياً ووظيفياً وإقتصادياً وكمان فى إستدامة المشروع بأقل تكاليف للصيانة وهى ثقافة غايبة كثير عن المصريين عموماً.
والتوجه دلوقتى فى الديكور هو البساطة والخطوط الصريحة والأشكال الهندسية لأن الناس تعبت من الزحمة والأشكال المعقدة إللى بيصعب صيانتها ونظافتها .
فى نهاية الحوار بنشكر حضرتك على تواجدك معانا وتشريفك لينا وإنشاء لله نتقابل تانى فى لقاءات متخصصة عن الجديد والمميز فى العمارة والديكور.

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك