الإثنين - الموافق 12 أبريل 2021م

الدنيا دي مش دنيتي بقلم: – عادل عبد الرازق

الدنيا دي مش دنيتي
ولا الزمان ده زماني
ولا ملامحي دي ملامحي
ولا كياني هوّه كياني
تايهة ملامحي في الوشوش
أمشي الطريق ماعرفوش
والرتوش .. كتيرة الرتوش
وكل شىء من غير معاني
الدنيا دي مش دنيتي
ولا الزمان ده زماني
أبدر أفراحي للناس
ماخدش منهم غير أحزان
أفتح بيباني للناس
وأدق بابهم ألاقي الحيطان
بدون أسباب أنا مكروه
بارسم دروب وانا باتوه
قلبي طيب لكن حيّروه
لمّا أصبح سجني وسجّاني
الدنيا دي مش دنيتي
ولا الزمان ده زماني
كل الدروب غروب
كل الشوارع مواجع
ماشي وانا بادوب
في اللي رايح واللي راجع
أغراب يا قلبي أغراب
سراب يا خطوتي سراب
ولا لينا غير العذاب
ولا حلّ غير المواني
الدنيا دي مش دنيتي
ولا الزمان ده زماني
***

 

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك