الأربعاء - الموافق 01 ديسمبر 2021م

إحدفيني.. بقلم :- عادل عبد الرازق

مدي إيدك واحدفيني
للشوارع
للي رايح واللي راجع
إشطبي إسمي وحروفي
وازرعي ف.قلبي المواجع
رجعيني تاني
متحطم ومتدمر
وضايع
إكسريني
حطّميني
ماعدش فارق عندي شىء
صدقيني
إحدفيني …

فتحت بابك ردني
قوليلي ليه ردني
وانا اللي كنت فاتحلك مداين
وانا اللي كنت راسملك وطن
لكنك بلا سبب ..
رفضتيني
وضحكتي مني
وبكّتيني
إحدفيني …

إنتي وانا كنا حواديت
كنا أساطير ومعجزات
كنا المداين والبيوت
كنا الكلام كنا السكات
لا كنت أسمع عالخيانة
ولا كنت اصدق عرَافين
كنت مآمنلك حقيقي
وكنت مصدق السنيين
لكني فجأه شوفتك
بتخونيني وف. وسط الطريق
في وش قلبي
وقدّام عيني
إحدفيني …

قمر السما يا حزين
ضيعتنا ليه السنيين
والشارع ده ضلمة ليه
والركن دا مليان أنيين
هل هيا دي ذكرياتنا
دا اللي باقي من حياتنا
يا خسارة يا عمري اللي راح
يا خسارة يا قلبي اللي ضايع
مدي إيدك واحدفيني
للشوارع
للي رايح واللي راجع
إشطبي إسمي وحروفي
وازرعي ف.قلبي المواجع
وايّاكي يوم تفتكريني
وان اتقابلنا صدفة في يوم
إعملي إنك … ما تعرفيني
إحدفيني
واتركيني
أنا معاكي انتهى زماني
وانتهت كل سنيني
إحدفيني

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك