وانتي وانا ..
إنتي وانا
ضايع منا حلمنا
ولا دلًنا
عنوان رجوعنا لدربنا
راح اللي راح
وانتي وانا ..
إنتي وانا
…
مع إننا ..
كنا ابتدينا نفهم بعضنا
ونرسم قوارب على شطّنا
ونرسم الزفة ف كفنا
راح اللي راح
وانتي وانا ..
إنتي وانا
…
على أدّنا ..
كان حلمنا
طول عمرنا
على أدًنا
وكتبنا فوق شجر الجناين إسمنا
ورسمنا على أبواب المدين قلبنا
ورجعنا نسأل في يوم
قالوا المدينة مش لنا
راح اللي راح
وانتي وانا ..
إنتي وانا
,,,
إحنا افترقنا ليه
إنتي السبب ولاً انا
إيه اللي كسر مابينا الحنيين
إيه اللي جرّى الخيانة ف دمّنا
ساعات بحس في عيونك خيانة
وساعات احسب إني ظلمتك أنا
ماعرفش مين فينا اللي ابتدا
ماعرفش مين كان فينا ضدّنا
راح اللي راح
وانتي وانا ..
إنتي وانا
…
وتشوفيني تبكي
وأشوفك أبكي
والمرّ جارح حلقنا
ضيعوكي وضيعوني
فرّقوكي وفرقوني
واحنا ما كانش بيدّنا
راح اللي راح
وانتي وانا ..
إنتي وانا
…
راح اللي راح
وماعادش باقي غير جراح
وكأننا ..
إنتي وانا ..
إحنا كنا اتنين غير بعضنا
إحنا كنا اتنين ضدنا
أو عكسنا
ولا راحش منا حبنا
غير بس لعرورنا وعندنا
راح اللي راح
وانتي وانا ..
إنتي وانا
لا اتغيّرنا يوم
ولا عرفنا يوم بعضنا
إنتي وانا
***
التعليقات