الخميس - الموافق 28 مارس 2024م

بنفترق —— بقلم – عادل عمران

ما بين العتمة والسور
ووسط الآهة ومداها
بنمد إيدينا للنور
في مدينة الضلمة ساكناها
ونفرش حلمنا قارب
يعدًينا في بحر الليل
نلاقي شطنا هارب
ولا نلمح ضيا قناديل
ماشيين بنرسم حلمنا
ماشيين بنحلم رسمنا
لكن نهاية مدانا
الحلم ضايع مننا
متغرًبة كل الحاجات
متلوًنة بشكل السكات
متشبكة ف طرف اللي فات
واللي رماها ونفاها
ما بين العتمة والنور
ووسط الآهة ومداها
إنتي وانا ..
جرح وجريح مجروح وجارح
إنتي وانا
دمعة بتبكي في كل المطارح
ماشيين ندًق بيبان الحقيقة
يسبح محالنا في بحور غريقة
والحلم مكسور من البداية
والحلم ضايع مننا
إنتي وانا ..
في ضلوعنا آه لسه ف صباها
ما بين العتمة والنور
ووسط الآهة ومداها
بنمد إيدينا للنور
في مدينة الضلمة ساكناها
ويبعد خيالك
وتتنفي لمسة إيديكي
وتشجًري شجر المرار
يا حبيبتي في ربوع واديكي
ويضلًم الحلم اللي عشنا نرسمه
وصوت الفراق يكسر أملنا ويقسمه
وبننتهي إنتي وانا..
ونتفرًق ما بين الصرخة وصداها
وبين العتمة والسور
ووسط الآهة ومداها
بنفتق إنتي وانا
في مدينة الضلمة ساكناها
*****

 

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك