الخميس - الموافق 28 مارس 2024م

إلى ” دال ” ———- بقلم / عادل عبد الرازق

لوّنيني بأي لون
كوّنيني أكون
واخلع رتوش الملامح
والمطارح


واشتهيكي كل لحظة
وارتديكي توب وروح

ما تزوّقيش صدق الملامح
خلًي المفارق ..
هيّا المفارق
عايزك زي مانتي
دواير دواير شكل الزمن

زي الشوارع
عابر سبيل لسه ضايع
خيول متركنة عالنواصي
ياحبيتي بتنطلق

ماتحزنيش لو بحري رمل
لو سرقوا مني تصريح مروري
أنا عمري ماقدرت أهمّشك
ولا عشقي كان لغير عيونك
فازاي أخونك
واصبح شقوق

طار الحمام لكن مسيره
يرع يعني عالسطوح
مهما الجروح زادت وطالت
حالقى على كفك وطن
حالقى في عيونك زمن
والقى ف مدايني كل البيوت

رغم أحزاني عشقتك
ورغم عنواني اللي ضايع عشقتك
إتعطّرت بأنفاسك
وبلون عينيكي حنيّت قلبي
عشقتك رعم زمني اللي مال
عشقتك رعم حزني اللي طال
وكتبت إسمك على شجرة
وأول حرف كان “دال”
***

 

التعليقات

مساحة إعلانية

مساحة إعلانية

انت لاتستخدم دايناميك سايدبار

الفراعنة على فيسبوك